法政匯思

維護法治精神、關心政制政事、匯集業界人士、廣傳進步思維。我們就是 《法政匯思》。

「恭喜你呀!」噚晚絲打Cissy一見到我就咁講。「吓?」我呆一呆。Cissy:「聽講你有咗喎!」我:「邊個講架?」Cissy:「早兩個星期龍舟比賽果陣我聽到。」我:「哦!其實係因為我趕緊單deal,更唔想參加比賽之後嘅after party喪飲酒,於是當行政部問我去唔去時,我話:『我預備懷孕唔方便去』推咗囉!我無講大話喎!作為一個女人,幾乎一生人都可以喺預備懷孕嘅過程,只不過我冇諗到咁都會傳出街唧!」

唔知係咪做我哋呢行壓力特別大,好多律師都好杯中物,國際大行嘅龍舟比賽、聖誕派對、周年晚宴等梗有喪隊酒嘅after party,有啲律師樓嘅合夥人,仲會逢星期五下晝四點左右,就會開始喺佢自己嗰個人咁高嘅酒櫃度攞啲酒出嚟,周圍叫人飲;又有啲律師樓,逢星期五傍晚都會包場happy hour,總之無酒不歡。問題係,我哋呢啲律師仔,手頭上嘅工作已經通頂都做唔完,仲邊有時間同你飲嘢呀?

有時候我真係好佩服我啲同事,飲完第二日又精神奕奕準時返工。就講今年龍舟比賽吖,之後果日係星期日,我早上八點幾返 office時,竟然見到前一日由中午飲到半夜嘅一個女合夥人同男見習律師都返咗工!嗰一刻,我有些少慚愧。不過,我自知真係冇佢哋咁飲得,加上律師飲酒出洋相嘅笑話我已經聽唔少,我唔想成為主角。

最出名果單律師醉酒鬧事,應該係十年前阿大律師馬恆利(Roderick Murray)醉酒後上庭遲到,又喺庭上拍掌、大笑等,結果被裁定行為失當,罰停牌半年。又,我律師樓行有個女intern,上年喺聖誕派對之後嘅after party飲大咗,以為自己喺老闆,對住啲合夥人亂講嘢。之後...冇得留低。

話時話,我覺得女仔真係蝕底啲嘅,細粒啲嘅可能得100磅,飲一杯已經等於個200磅嘅大漢飲兩杯!仲有,唔飲又可能畀人話唔埋堆,飲多啲玩放啲又可能畀人話唔檢點唔知博咩。喺呢啲場合飲酒,真係同啟晴邨邨民飲水一樣,一啖一驚心。不過以上係我個人意見,我都識得好多人係真心享受呢啲場合嘅,Cissy就係其中一個喇。

Cissy:「你預咩鬼嘢備懷孕丫!飲就飲啦!拉勻一世人,你飲嘅酒實少過世衞標準啦!」OK,就憑呢一句,我很肯定佢已經醉咗。

 

法政匯思facebook 專頁:https://www.facebook.com/proglawgroup

 

Share On
Dislike
0
飲酒     法政匯思

發表評論