王若愚

傳媒、出版工作者。先後於立場各走極端的機構服職。撰有著作數種,包括《中國潮語通識》(2011)、《驚世尋謎 屍人檔案》(2015)。曾為《新報》撰寫「華夏之謎」專欄。

一場建制派鬧劇,史稱「蝦碌事變」,讓市民熱烈地彈琴熱烈地唱了整個星期,一地花生殼。可是,正如黃國健議員話齋,「食飽花生,你笑得幾耐啫?」,我們好應該從蝦碌事變身上汲取經驗和教訓(雖然,身為花生友的你我,根本唔知汲取這等教訓來幹嗎)。

 

這件事應該做、值得做、快啲做,千祈唔好等埋發叔。

 

  1. 玩Whatsapp group,用字諗清諗楚:正所謂知人口面不知心,群組連「口面」也不知道(你只知道表情符號),防人之心不可無,千萬不要掏心掏肺,否則只會么心么肺。

    被人踢爆「賊來了」,還算小事;被人知道自己「下面反應好大」,才真的嬲嬲豬。我不明白,鑑林的「性向」被人嘲笑了好幾天,為何還沒有建制中人披上彩虹圖像向他示意支持?阿爺正義聯盟的義氣何在!?
     
  2. 不誠實取用whatsapp逍遙法外:近年「JING CHA」的大絕招「不誠實取用電腦」,濫告誣告亂來一通,實在是一件簡單好使攞你命三千的大殺傷力武器。但為何「內鬼」無恥傷害愛國愛港陣型的感情(佢地的感情,如同十三億人民的感情一樣,是多麼脆弱),竟然尚未被控告「不誠實取用Whatsapp」,實在太magical。點解嘅?點解會咁嘅?好打耳呀。
     
  3. 做內鬼,小心身邊有傻強:正所謂呢度唔係法庭,唔需要證據,雙眼就係證據。如果有朝一日你要做內鬼,切記:當心身邊有傻強!

    古有《無間道》傻强教你:「如果一個人,做緊一樣嘢時候,好唔專心咁望住你,咁佢就係臥底啦!」

    今有《立圾會》Tree根告訴你:「上大人講話唔好捉,即係捉咗囉。」一切不證自明,佢話你係你就係,唔使解釋,解釋都沒用,再叻叻的間諜二五也舉手投降。
     
  4.  等對手犯錯:早前網絡潮語是「唔怕神一般的對手,最怕豬一般的隊友」;但計我話,「唔怕豬一般的隊友,只要有比豬更蠢的對手」。

    話說「蝦碌事變」發生前,有位江湖經驗豐富的哲古華拉議員,無端白事講個不必要的大話,然後無端白事自爆講大話,成功將全城焦點轉移,連689也搵到位入,果然話你戇鳩怕你嬲。

    但唔怕,無論犯了多少錯,只須沉著氣,收埋自己暫避風頭,好快,豬一般的對手便會自動獻身代為拆彈。你永遠不知道對手是多麼的「有層次」,像一種名叫旅鼠的生物,「齊齊整整」(葉劉語)地自殺,讓你全身而退。
     
  5. 哭,你為了感動誰:蝦碌事變後,多名議員上演哭喪戲。然而,他們愈是痛哭,市民愈是歡暢;他們塗白花油擠眼淚,市民笑到標眼淚。

    當然,他們的哀哭對象,並非市民,而是他們的主子。然而,那主人對自己的狗,不見得很好(還搞狗肉節呢),於是乎,議員一腔眼淚,恐怕最終如歌詞一樣,最終流入溝渠:

    哭 我為了感動誰
    笑 又為了碰著誰
    看著你的眼 勾引我的淚
    為何流入溝渠

 

王若愚 facebook 專頁:https://www.facebook.com/cynicalidea

Share On
Dislike
0
王若愚     建制派     政改     離場

發表評論