周庭希

澳門政治人物、社運人士、同性戀權利運動人士、社團工作者,網上團體澳門良心成員,愛瞞傳媒社長,新澳門學社理事。

歐洲經驗冇得抄

如果有坐過歐洲嘅 Eurostar (來往英國、法國、比利時首都嘅高速火車) 嘅朋友,相信都會留意到 Eurostar 車站有「一地兩檢」(「juxtaposed controls」我覺得準確應譯做「互設邊境檢查站」)。英國為堵塞有人坐火車到達英國境內先申請做政治難民嘅漏洞,同法國、比利時簽署三方協議,授權英國警察喺巴黎北站、布魯塞爾南站嘅英國控制區(UK Control Zone)內執行英國入境同刑事法律,而相反,法國警察喺倫敦 St Pancras 執行神根區入境檢查工作。 此外,控制區內警察有拘捕權,亦享有等同於當地執法人員嘅法律保護。

香港西九高鐵同歐洲嘅「一地兩檢」唔可類比,因係英、法、比三國法治水平差異絕唔可以同中、港執法水平差距一同而喻。而歐洲互設關卡嘅主要目的唔係為咗「方便旅客」,而係要預先阻止不合資格人士上到火車進入目的地境內濫用難民申請機制。

目前被吹過風西九一地兩檢版本,似乎無一可令人接受:

一、延伸大陸法律管轄範圍

香港西部通道同橫琴澳門大學區都係分別延伸香港、澳門法律管轄範圍去大陸劃出嘅指定區域。如果調返轉,將大陸管轄區延伸至香港,咁就大鑊。幾年前橫琴起澳門大學新校區時,雖仍屬大陸管轄範圍內,但所有錢都係澳門政府出。香港納稅人用幾百億起咗個站地底隧道,最後執行中國法律,咁真係傻咗,不如叫中央幫手埋單?

二、中國公安喺香港境內行使部份權力

即使劃定中國警察喺西九總站特定控制區內先可執法,當火車入香港後到達西九站之前,如果有雙非孕婦啱啱生仔或有人提出政治難民申請,咁用香港定中國法律處理?如果有外國人、香港人喺西九站俾大陸拒絕離開中國邊境,香港政府又冇得插手?無論俾香港、中國警察有優先執法權,都好容易變成出入境漏洞,第日慢慢俾人發掘點利用。

三、香港警察代替中國公安執法

由中央授權香港警察代理大陸警察執行大陸入境法律。香港警察如果執行香港法律出現問題,可以向法院申請司法覆核。但如果香港警察執行大陸法律嘅時候出錯,可交俾邊個去審查?中國「人民」檢察院/法院?

香港官場大陸化(或者澳門化)

香港似乎正步澳門後塵,喺冇正面解答公眾提出質疑情況下,天價工程都要霸王硬上弓。澳門政府可以一宣佈就投資百幾億去俾錢大陸公司去橫琴買地、起大學,幾乎冇正式諮詢公眾,最後得出天價豆腐渣工程。

記得2010年香港立法會財委員會審議高鐵撥款時,梁國雄已提出西九總站「一地兩檢」敏感技術性問題,但當時香港政府俾唔到答案。拖到依加最後都要面對喺香港市中心設立中國邊檢關卡嘅爭議。「一地兩檢」絕對係值唔值得駛幾百億做直通高鐵嘅 selling point,一地兩檢「可行性研究」都未攪掂,早就唔應該決定起。當年曾蔭權政府學曬大陸官場嗰套做政積工程,最終全民埋單,睇嚟港澳命運「殊途同歸」。

Share On
Dislike
0

發表評論