藍友斑

建築師、公司合伙人,業餘寫作,夾雜於新舊世代之間,寫盡港式生活故事。

眨下眼又到咗大學生準備畢業的季節,每年呢個時候,總會有好多師弟同家長走嚟問藍友斑,到底一個老闆係點樣決定去請一個人,同埋問我職場的「上位指南」,藍友斑出嚟做嘢都差唔多十年,起碼都叫in咗過千人,雖然談唔上什麼心得,但當中一啲有趣的經驗,或者可以同各位讀者分享下,當然我in嘅係建築系畢業生為主,但我相信各行各業老闆請人的標準,其實都大同小異。

 

事先講明,呢篇文章集中講fresh grad市場,如果你係返咗幾年經驗工的「轉工者」,唔好太在意,呢篇文或者唔啱你睇。

 

一.學歷只是過濾網

每個見第一份工的畢業生,唔少都好緊張自己的學歷,學歷到底有幾重要?藍友斑自問就唔太睇,總之你係大學畢業有個Degree,就起碼Fulfil咗唔少人事部揀人的第一個要求;你要記住你份CV係send俾HR,而HR請人係根據一啲老闆訂下的條件而去做最初步的篩選,所以let’s say如果你有Degree或以上的學歷,基本上係過第一關而已。藍友斑自問大學時期上莊、搞學生會嘅時間仲多過讀書,我唔係一個讀書非常叻的人,所以我好明白GPA高只不過係一個選項,真正重要嘅,係封Cover Letter同面試時的態度,呢兩點容後再談。

 

二.估老闆請人的心思

唔少畢業生其實係死在係呢點之上,無錯,或者你客觀條件符合晒老闆的要求,但一見面就出事,主要係因為你無好好估計老闆請人的心思,每一份工都有佢嘅JD,每項要求、職能寫得上去,就一定有佢的原因,見工或者Apply份工之前,不妨好好揣測下老闆請人的用意,記住一間公司係各有分工,無可能一個人做晒所有嘢(除非公司規模好細),如果你明白公司需要邊一種員工,而去為呢個職位做好事先準備,咁就一定有分加。

 

三.Cover Letter勿hea寫

如果你知道CV係俾人事部睇,咁樣封Cover Letter,其實係俾老闆睇,以藍友斑為例,HR揀咗CV入我房,我多數都唔會再翻睇,反而係睇求職者的Cover Letter,我會好仔細睇一次,如果係個種「倒模式」的英文Cover Letter,我會毫不猶豫地將佢送入垃圾桶,因為你擺明hea寫份求職信,作為老闆,亦無必要見你;相反,如果你份求職信係專為個職位而寫,而且一字一句都係用心嘅,老闆絕對會睇得出,唔好太介意grammar啱定錯,只要俾心機寫,都會比一份倒模但grammar全對的Cover Letter更出色。

 

四.面試不卑不亢

 

如果你要我俾Fresh Grad面試的最大忠告,就係四個字「不卑不亢」,藍友斑最怕見到一見面就刷爆老闆鞋的面試者,因為你根本唔識我,就不斷刷我鞋,我諗起都已經想嘔,呢啲面試者我會即刻3分鐘內踢佢走;但如果你太囂張,完全一副唔憂做的態度同氣勢去見工,我都一定唔會請你,因為如果你係咁叻,咁就請你另謀高就;so far藍友斑出錢請同夾得嚟的同事,全部都係待人處物方面做得唔錯,每日同佢地一齊工作,好舒暢同自在,諗起當日我請佢地時,全部都係不卑不亢嘅態度,記住,所有工作都係面對人的工作,如果你無法正常咁同人相處,你見得成份工嘅機會,都幾渺茫。

 

(見工那些事一之二)

 

*《斑駁陸離》逢星期一、三刊於《 香港投資日報》

Share On
Dislike
0

發表評論