藍友斑

建築師、公司合伙人,業餘寫作,夾雜於新舊世代之間,寫盡港式生活故事。

藍友斑上星期參觀了一間「歷史悠久」的傳媒公司,間公司話大唔大,但都算係上市公司,名就唔開了,畢竟呢間公司都出晒名聲名狼籍,成日拖人數唔還;或者聰明的讀者睇睇下就會知道我講邊間,至於點解我會到訪該公司呢?因為佢地想訪問大老闆,所以邀請我同助手上去視察下,當然,佢唔知我就係藍友斑。參觀完之後,我決定將我參觀所得列晒出嚟,如果閣下公司有類此跡象,留下工作實在無意思,仍有戰意的你,不妨考慮另謀高就。

 

首先,呢間公司的走廊實在亂七八糟,一地廢紙舊刊,我知道傳媒公司一定多文本要整理,但成個環境實在亂中無序!未講manage員工的能力,先從manage辦公室整潔的能力嚟講,呢間公司實在fail,連工作環境都管唔好,咁對管理員工方面仲可以有咩expectation可言。我睇住啲員工出出入入都要左閃右避,因為一唔小心就會撞跌一堆書同舊刊,如果我係呢間公司的員工,要在如此惡劣的環境工作,我一定會好氣餒。

 

古語有云「工欲善其事,必先利其器」,你的equipment如何,你的員工效率也必如何,作為傳媒公司,佢地係呢方面實在失敗,譬如我行咗一圈,見到所有員工的座椅,係最cheap最舊會坐斷腰個種,而且唔少連櫈背都無,唔講我以為啲櫈係堆填區執番嚟,如果坐係呢啲垃圾櫈上面工作,唔使三兩日必定腰酸骨痛,可想而知呢間傳媒公司的管理層有幾咁「錫」自己的員工。其次,今時今日各行各業最重要的,就係部電腦,主機又好,螢幕又好,都會影響工作進度;係呢方面我覺得絕對唔慳得,因為硬件投資係一種fixed asset,唔使年年換最新,但起碼唔好差科技太遠,而我所參觀的呢間公司,哇,大部分電腦螢幕仲係用緊90年代的「大肥mon」,講真,藍友斑自有LCD mon年代開始,就真係未見過仲有人用大肥mon,要數都應該係上世紀的事,個種mon唔止睇壞眼,外觀仲好樣衰,如果俾著藍友斑係自己office見到大肥mon,我會毫不猶豫咁將佢送去堆填區。問題係呢間傳媒公司的「大肥mon」,驟眼睇係超過50部或以上,而今年已經係2016。

 

而最令我拍爛手掌,係佢地仲用緊Window XP!連微軟都淘汰左Window XP啦,竟然仲有公司用緊,唔止係一部電腦,係成間公司的系統都仲係Window XP!所以我見到除了一些老大姐仲會用公司電腦之外,後生少少的同事,全部都係用自己laptop,我抽問其中一位後生同事到底幾何會用到公司電腦之際,佢答我:「除咗要print文件之外,平時都唔會用公司機,問題係有時print文件都會輕機......」係呢位員工口中,我聽得出佢對公司有無數的怨言,只係盡在不言中。

 

話晒都叫擁有過百員工的傳媒公司,對佢地黎講,除咗記者、編輯重要之外,仲有咩係關鍵呢?無錯,就係相片,如果你做雜誌周刊無靚相,今時今日真係搵鬼睇,今次我有機會參觀呢間公司的studio,哇,一入到去,真係大開眼界。

 

首先係個地板,又霉又裂開,而啲工具又污糟又鋪塵,一睇就知道影完相就算,根本唔會有人清理呢間房,所以令我覺得衛生條件就在太差,入到去完全唔敢touch入面任何一樣嘢;由於我公司之前有同某幾間影樓合作,印象中專業的影樓首先係每間的室內設計都很有style,傢具都有唔少details位,最緊要企理、整潔、舒服,呢間公司的studio俾我的感覺,就如垃圾崗一樣。

 

無錯,影相只係其中一環,執相能力都係關鍵,要執相執得好,電腦總不可以太廢對吧,但我見到攝影師用的電腦已經係上幾代的mac,其中一部仲已經黃晒,枱面仲要倒瀉咗咖啡未抹乾淨,攝影師的執相房不過200呎,非常侷促之餘仲要不見天日,係咁差的環境影相執相,出街的products到底可以有幾靚?我真係諗都唔敢諗。

 

行完一圈,我對呢間所謂的媒體公司極無信心,於是急急離去,留低只係浪費時間;我真心覺得係呢間公司返工的員工好慘,至於最後有無接受佢地的訪問邀請?當然無啦,藍友斑返到自己office,即刻叫秘書推咗佢,that’s all。

 

*《斑駁陸離》逢星期二、四刊於《香港投資日報》

 

藍友斑 Bernard

Share On
Dislike
0
垃圾     公司     員工     斑駁陸離     香港投資日報     斑駁陸離‬     腦細     無眼睇

發表評論