藍友斑

建築師、公司合伙人,業餘寫作,夾雜於新舊世代之間,寫盡港式生活故事。

藍友斑很愛看決戰場面,例如魔人布歐和悟空的決戰、海賊王路飛和CP9的決戰、火影鳴人和佐助的決戰、以至Slam Dunk的湘北對山王......決戰,即是挑機,大戰之前,一定有佈局,營造種種決戰的氣氛,這樣讀者看起來,才會過癮。

 

而一班所謂的YouTubers,走到大台上參與製作這個《網絡挑機》的節目,本身看宣傳片而言,的確很有挑機的意味,似乎網上力量將跟傳統媒體來一場對決,但試問有誰能想像到,只是第一集,就已經證明這班YouTubers挑機失敗。

 

要數最具爭議性的人物,當然是梳怪頭的司徒夾帶,我對「師傅」的感覺一直不錯,最深印象的是他在HKTV等議題上多次拍片發聲,每次都贏得網民的掌聲,我對他的印象,是「反對一台獨大」的言論領袖型人物,但這次他參與《網絡挑機》這個節目,很明顯是失敗的、錯誤的決定,事關他是個反TVB的人,竟然接受TVB的邀請,參與製作他眼中的「共業」節目;而節目第一集,TVB就以近乎「恥笑」的方式,來嘲弄這些網絡名人。

 

譬如說司徒夾帶對阿叻的談話中,可見阿叻由始至終在上風,先不論剪接如何,但客觀感受來說,成件事就係司徒夾帶成個小學雞咁,聽老師訓話,而身邊那位Miss Hunny,連一個小學生都不如,因為她只是一個mic stand。

 

節目出了街,剪接權在TVB手上,基本上TVB不可能播一些反對自己的節目,小嘲小弄無所謂,但你想從根底裡反對TVB,更是透過TVB的廣播時間來反對它?傻嘅都會知道無可能啦!難為司徒夾帶常常扮有stand有獨立思考,面對大台的揮手,佢竟是第一個將褲子脫掉,得失自己一直以來的支持者,真係卿本佳人,奈何作賊?

 

本身成件事就係自己樣衰咗,人少少上網認咗佢,道句歉,咪算囉,司徒夾帶仲走去拍片澄清,結果愈係想澄清,件事就愈混濁。佢條澄清片,藍友斑睇咗好幾次,我淨係覺得佢「死雞撐飯蓋」,不停兜、兜、兜,將所有不是都推到TVB身上,哦,牛唔飲水點引得牛頭低,你唔上去拍咪咩事都無囉,依家出咗事,你第一個要怪嘅,就係自己。

 

最令藍友斑感到驚奇嘅,係司徒夾帶在片尾提及,自己因為此事而上了報紙C1,而且他似乎因此感到振奮,臨尾仲講多句:「我都要多謝TVB。」我一時以為自己聽錯,再講多次,佢真係咁講。

 

吓?司徒夾帶多謝TVB?多謝TVB?你食錯藥啊司徒夾帶?

 

早前你仲係度拍片罵爆TVB,話TVB一台獨大好衰格,令個成個香港創意產業停滯不前,依家你有得上TVB拍節目,就即刻多謝TVB俾位你上、俾你搏見報?各位,我可以從此斷定所謂的司徒夾帶,及旗下一籃子偽人Youtubers,絕對無甚麼道德可言,因為佢地見高就拜,只要有錢,要佢地輪流拍片跳海都係咁話。

 

無錯,司徒夾帶係要搵錢,現實世界人人都要搵錢,搵食啫,犯法呀?當然你無犯法,只不過係搵錢有好多方法,如果要我搵錢,但從此背棄舊時支持過我的人,唔好意思,我真係做唔出,而呢類人係藍友斑眼中,只係寄生獸,就好似司徒夾帶般的Youtubers,寄生係一個理念之上,當自己找到另一棵搖錢樹,就截然寄生在它之上。當日司徒夾帶等人慷慨陳過的辭,通通被TVB這個節目一鋪清了袋。

 

或者司徒夾帶及其他YouTubers會更紅,從此更多公司會找他們拍廣告、賺錢賺到笑,但如此醜陋的轉身和失格,一句到尾,you will never have my respect。

 

*《斑駁陸離》逢星期二、四刊於《 香港投資日報》


附上司徒夾帶訪問王維基時,如何寸盡TVB:

 

Share On
Dislike
0
王維基     斑駁陸離     藍友斑     香港投資日報     斑駁陸離‬     司徒夾帶     網絡挑機

發表評論