藍友斑

建築師、公司合伙人,業餘寫作,夾雜於新舊世代之間,寫盡港式生活故事。

自從大學畢業後,藍友斑就不停返工做做做,好在大老闆甚為關照,任內都完成到幾單大projects,幫公司賺到幾大桶金,具體數字就唔講啦,但今年藍友斑收到人生中最大嘅一張稅單!終於,上星期五,我正式成為公司嘅partner,大老闆好豪氣,分咗8%公司股份俾我。

 

從此之後,間建築師樓我都有份,我由打工心態,突然變成老闆仔心態,今個星期返工,睇嘅嘢真係完全兩個世界。

 

我之所以咁講,唔係想話自己個世界變得高高在上,而係有更多的憂慮!大老闆俾我access公司嘅所有銀行、股票戶口,我知道公司有幾多支出、盈餘、負債,又知道每一個同事嘅人工,甚至有幾多股票都一清二楚。從此藍友斑返工無得咁輕鬆,因為我每一個moment都會諗:「呢壇生意我都有份,出面有二百幾個同事跟緊我食飯。」唔止香港,北京個邊都仲有百幾個同事;而出面返緊工嘅,有新請番嚟嘅建築師助理Tammy、HR Susan、甚至茶水部嘅瓊姐,租金電費樣樣都係錢,我會好佩服我大老闆,到底當初佢係點創咁大間公司出嚟。

 

有讀者想知我係邊間建築師樓做,sorry,真係唔講得,因為我老闆個姓幾特別,一講出嚟就查到係邊個;總言之,我成為咗公司嘅股東,我每日睇住條數出出入入,精神壓力之大,希望大家想像到。返咗一星期工,我真係幾懷念當初打工個種無憂無慮,但我由衷明白,男兒大丈夫應該人望高處,有得做老闆,當仁不讓。

 

我突然之間記起《100毛》林黑面講過嘅說法,大概係話自己創立《100毛》,個目標就係死唔去就得,當日我仲未明白佢嘅心思,但呢個星期開始,我完完全全明白佢講咩,無錯,我唔敢奢望自己要發咩大達,亦唔奢望間公司要翻幾倍,我呢一刻,只有最簡單的盼望,就係眼前我工作嘅地方、同事、伙伴,可以無憂慮地繼續係度工作。

 

Btw,我終於坐入間大房,入面有梳化、電視、音響、單車機⋯⋯office 間房仲大過自己屋企間房,同事開咗幾支Krug同我慶祝,之後大老闆拎住杯香檳,走嚟搭我膊頭,佢講咗句說話,令我好震撼:

 

「Bernard,我真係老啦,唔夠你咁有精力,你呢間房望出去嘅所有嘢,都有你份,加油,靠你啦以後。」

 

人與人之間嘅信任,去到一個地步,竟然可以將自己大半生奮鬥嘅生意,完全交付係另一個人之手上,呢份勇氣同信任,我佩服得五體投地。我問佢點樣可以做到咁信任一個人,大老闆佢笑笑口耍耍手,佢話:

 

「好似你呢種人,我知道終有一日,你會出去闖自己嘅公司,我依家可以做的,就係希望將你留住,所以分股份俾你都無所謂,你有權選擇受定唔受,而我好高興,你選擇受。」

 

講到尾,成為partner後,絕對係開心自豪,但接下來的,是我要背負著成間公司嘅前途,以至每位同事有無飯開嘅責任,希望我做得到,而且愈做愈好。

 

藍友斑 Bernard

Share On
Dislike
0
100毛     林日曦     老闆     斑駁陸離     藍友斑     香港投資日報     斑駁陸離‬     Partnership     老闆‬

發表評論