藍友斑

建築師、公司合伙人,業餘寫作,夾雜於新舊世代之間,寫盡港式生活故事。

食完晏返office,藍友斑見住一大班後生同事圍住個電腦起勢笑,好奇之下圍埋一份,原來佢地唔係笑鍾樹根選輸咗,而係笑麥當勞推出嘅「$9,999愛意無限派對」。喂,有無搞錯呀90後,呢單嘢已經係上星期啦喎,仲拎出嚟笑?

 

「阿頭,你竟然都知道?」Mandy顯得有少少驚訝。

 

喂妹妹,我其實都係個80後,我都有玩Facebook,我都有個Facebook page(呢樣佢地可能唔知),講起網絡世界嘅事,我隨時知得仲多過你。

 

「係喎,阿頭你點睇?不過睇你個勢都一定酒店搞㗎啦!」Terry問。

 

無錯,我會係酒店搞,仲要搞得好好睇睇,結婚呢件事一生人一次,我同女友Amiee都已經有咗共識,我地對傳統好老套個種婚禮(即係睇成長片段、早拍晚播個種)都好反感,而我個人對於婚禮,一直都有憧憬,希望classy得嚟又窩心,而且唔會令來賓起雞皮,做得到出入安心,已經係種成就。

 

而係麥當勞搞婚禮,我覺得唔算得上係搞婚禮,而係搞笑,如果呢件事係用嚟大班朋友玩下嘢,或者聚下會,我會覺得fine、okay,但如果真係用嚟搞認真的婚宴,你話我老套、傳統都好,一定只會say no。

 

好簡單,你打開個網址睇,就用最貴嘅「$9,999愛意無限派對」為例,入面包啲咩呢?首先,包兩個鐘50人場租,同港幣3,000元嘅麥記美食,除番開每人有$60左右嘅麥當勞餐飲,即係兩至三個套餐份量嘅野食;另外個$6,999,除咗場租,係去咗邊度呢?

 

哦,有一對氣球戒指啦,無錯,真係用氣球做嘅戒指、同埋有骨骼精奇嘅薯條相架啦、一個簡陋到不得了嘅易拉架啦!大佬呀,Are you kidding me?麥當勞嘅Marketing係咪傻咗?我明白一分錢一分貨,但呢個陣容會否太過白痴?你以為係幼稚園小朋友搞婚禮嗎?

 

最令我「拜服」嘅,係一個用蘋果批盒砌成嘅結婚蛋糕,搞錯呀?蛋糕要幾多錢呀麥當勞?用蘋果批連盒做蛋糕?如果真係有人去麥當勞搞,而職員推蘋果批盒蛋糕出嚟時,無人笑嘅話,我今日開始三餐只食麥當勞,食到2016年,絕不走數。

 

或者我已經係大人,已經無咗個份童真,聲大夾惡又銅臭咗。寫到呢度,我突然記得幼稚園個陣,已經有同學仔之間互相稱呼對方做「老公、老婆」,一塊檸檬夾心餅兩份分,你餵佢,佢餵你,幾咁天真無邪而純潔,或者麥當勞推出所謂婚宴嘅真正目標顧客群,正正係為呢類兩小無猜嘅幼稚園戀人而設。

 

「唔係喎,阿頭,真係有人想去老麥搞喎,嗱你睇下呢個post。」Terry開俾我睇時,條友真係寫到似層層,你當我真心也好,我想呼籲呢位網友,懸崖勒馬呀。

 

有人話結婚係兩個人嘅事,我一直對呢種想法好有保留,因為我由衷覺得係兩家人嘅事,始終家中有長輩父母,唔係事事要聽晒佢地話,但最起碼係呢件人生大事上唔好咁兒戲,考慮下佢地嘅感受,畢竟無佢地帶你嚟到呢個世界,你唔會有機會遇到那位,你所深愛的另一半。而婚宴呢家野,貴有貴搞,平有平搞,但點搞都好,就算你個位是肯同你捱麥記嘅女友都好,一定唔好係麥當勞。

 

藍友斑 Bernard

*《斑駁陸離》逢星期二、四刊於《香港投資日報

‪#‎香港投資日報‬ ‪#‎麥當勞‬ ‪#‎婚宴‬ ‪#‎結婚‬ ‪#‎擺酒‬ ‪#‎斑駁陸離‬

 

Share On
Dislike
1
麥當勞     藍友斑 Bernard     藍友斑     擺酒

發表評論