藍友斑

建築師、公司合伙人,業餘寫作,夾雜於新舊世代之間,寫盡港式生活故事。

一個人被人吹捧過度,往往seven咗都不自知。呢句話完全體現咗係大律師林作身上,無錯,佢張cv係好靚,家底係好好,但佢近日嘅所作所為,完全係抹殺咗所有人對「精英」一詞嘅期望,好明顯佢仲係好幼稚,仲係一隻初生之犢,林作現在嘅處境非常尷尬,我幾肯定佢私底下,已經亂咗章法。

 

林作咁高調參選,又用港姐麥明詩個朵,近日又頻頻見報,無非就係想食政治飯,於是藍友斑都抽咗少少時間去研究呢個人,我本人唔識佢,只可以透過陶傑網上節目《菁英會》去觀察佢嘅言行。陶傑係該節目中,自詡精英,又搵埋林作同另一個後生仔(唔記得叫咩名)一齊做主持,捧林作捧到上天,好似係可以拯救香港嘅絕世奇材咁,節目中,陶傑坐中間,另外兩個人就好像左右護法咁,陶傑往往搖一搖紅酒,一開波就問林作「如何定義精英」、「精英思維有何特點」之類嘅幼稚問題,大佬呀,今時今日俾人咁問法,仲可以臉都唔紅,故裝高深咁滔滔不絕,曲線又直線自認精英,你識唔識個「醜」字點寫呀林作?

 

林作仲後生,可能真係唔識「醜」字點寫,好,藍友斑教精你,如果你想贏,唔該,先放下高高再上嘅「精英」身段,遠離陶傑嘅吹捧或(or吹水),貼地啲,先好再學人繼續選。唔好再用精英嘅角度睇世界,特別係你所選嘅龍星選區,住得係龍星,都係正常地球人,林作你嘅言行,同講火星話無分別。

 

林作覺得精英最緊要係「獨立思考」,無錯,獨立思考係重要,但唔一定好,因為如果你不斷去獨立思考一件錯嘅事,唔聽世人所思所想,一意孤行,結果可能只會鑽牛角尖,愈講愈錯。好簡單,希特拉都有獨立思考,and then?

 

所以,藍友斑覺得一個人要稱得上「精英」,除咗要有出色嘅智力,最緊要係要懂得審時度勢,特別係政治圈內,利益關係複雜無比,一個人如果睇唔清人同事之間嘅利益瓜葛,最後平衡不了各方利益,試問咁樣點有能力搞好政治?或者林作真係too young too naive,唔識得審時度勢,因為佢竟然連自己師傅清洪大狀,同佢對手譚香文打緊官司都可以唔記得(or詐唔知),貪一時之快將「清洪全力支持」印咗上單張,搞到呀師傅無端端捲入咗政治漩渦,如此魯莽、大意,同「傻仔」無異。

 

無所謂,起碼林作佢仲係一個懂得自我安慰嘅傻仔,事關傳媒問佢點睇清洪大狀唔再出面支持,佢竟然可以答覺得清洪心中仍然支持佢,如此阿Q又無厘頭嘅答法,話佢傻仔絕不為過。

 

好了,總結一下,如果林作想有得繼續選,要點做?首先,唔好再理咩陶傑,或者唔好再咁肉酸參與個咩「菁英會」節目,真正放下身段,唔好玩咩噱頭,做番啲impress人嘅實事;第二,唔好再搵人過橋,皆因世上沒有無緣無故嘅幫忙,出得嚟行,除了預咗要還,仲要預埋有人害你、跣你、勒索你;藍友斑講到咁盡,無非係點醒你,因為你實在雷聲大雨點小,自稱精英大律師,但又眼太高手太低,實在睇唔過眼。

 

題外話,如今10A麥明詩見到自己個「男友」咁狼狽,會唔會有啲後悔?anyway,我都希望你地可以捱過呢一關,林作可能會輸掉選舉,但贏到真愛。

 

註:龍星選區候選人尚有譚香文、岳敬寬及何偉權。

 

*《斑駁陸離》逢星期二、四刊於《香港投資日報 》

Share On
Dislike
0
斑駁陸離     林作     香港投資日報     斑駁陸離‬     藍友班

發表評論