藍友斑

建築師、公司合伙人,業餘寫作,夾雜於新舊世代之間,寫盡港式生活故事。

中學同學Tomas結婚了,全世界都祝福佢,佢婚禮係美國搞,藍友斑雖然近排工作好忙,但由於是舊時同窗,我讀書時佢係班長,加上唔少老友都話會出席,所以都決定去賀一賀佢。我特登同大老闆請咗四日假,飛轉美國,無錯,的確係來去匆匆。

 

坐咗十幾個鐘飛機,真係人都乾晒,好在我坐的是CX,整體都算舒服,題外話,呢次坐長途機最開心嘅唔係咩飛機餐有魚子醬,而係竟然可以食得番合味道杯麵!一個杯麵先幾蚊,我支持國泰應該入多啲合味道,呢樣野真係好得乘客歡心。一落機,Tomas已經安排咗部車接我,行李亦無delay,呢個係一個好開始,我笑住同Tomas講你個wedding一定順利,佢笑而不語。

 

去到婚禮場地,係典型的花園式婚禮,白玫瑰同白色長椅,簡潔得嚟又有taste,每個細節都點到好處,咁又難怪,因為Tomas本身係蘋果做設計師(無錯,係電話個蘋果),所以天生個人都有美感啲,佢問我:「喂,大建築師,有無位可以再執靚啲?」

 

Things just can't be better,my friend。

 

婚禮快將開始了,大家都穿得好隆重赴會,藍友斑都係著西裝,打咗個藍色bow tie,宴會上見番各位舊同學,十八年又過去,人人都唔同了,但講番當年啲作反壞學生衰嘢,大家都覺得猶如昨天。音樂奏起了,各位就坐,全場人都向後望,等一對新人入場。

 

隨著婚禮進行曲,Tomas挽著同佢另一半緩步進場,兩人都穿著同一款的tuxedo,係Tomas高少少,我非常欣賞佢地套suit,就係最基本的黑同白,無珠片無多餘的花紋,簡單而典雅。走到台上,Tomas好細心咁為David戴上戒指,歡喜之情言溢於表,最令人窩心嘅係Tomas同David幾乎全程都拖住手,我坐得好前,睇得出佢地拖得好緊,好緊。

 

之後Tomas向一眾好友點頭致謝,而David就發表佢地嘅結婚宣言:「我同Tomas識於大學時期,我地兩個讀同一個系,住同一個宿舍,生活上平時有好多爭執,但好感激Tomas佢從來都咁包容我,接受我嘅唔完美。我地深愛對方,但願一起活到老,多謝在座各位蒞臨我地嘅婚禮。其實我地本身想係香港搞,但覺得香港辦同性婚禮始終不及美國普遍,所以最後決定係美國搞,要大家千里迢迢到美國觀禮,我同Tomas,只有無盡的感激,多謝各位。」

 

講下講下,發現身邊唔少人都洋蔥咗,藍友斑亦好感動,我一直都止住淚水,但最後Tomas道謝時,講了一句說話,令我都忍唔住流下男兒淚:「我們,你們,在座各位,都有自己深愛的人,大家的愛都是一樣,我剛好遇上David,而他是同性,僅此而已。」全場起立鼓掌。

 

食完,飲完,笑完,唱完,跳完,大叫完,我返到酒店,打開手機,News Feed彈出的第一單新聞,十分eye catching,而條標題係《天主教圖影響區選 主教湯漢發聲明斥同志運動》。

 

藍友斑 Bernard

 

*《斑駁陸離》逢星期二、四刊於《香港投資日報》

‪#‎香港投資日報‬ ‪#‎國泰‬ ‪#‎同性‬ ‪#‎婚姻‬ ‪#‎真愛‬ ‪#‎湯漢‬ ‪#‎斑駁陸離‬

Share On
Dislike
0
婚姻     同性     藍友斑 Bernard     藍友斑     湯漢

發表評論