藍友斑

建築師、公司合伙人,業餘寫作,夾雜於新舊世代之間,寫盡港式生活故事。

鏗鏘集》呢期好紅,皆因入面有三隻反智動物,兩男一女,係節目度大講對收租的看法,其言論相當「出位」,譬如話「租金唔升,經濟邊有得發展」、「唔係業主加租,而係租客願意俾更高價錢」,對於呢啲說話,除了罵一句「傻的嗎」之外,你真係吹佢地唔脹,因為始終加租與否,係業主嘅自由,但係呢一種自由,唔應該夾雜高傲無知的愚昧,呢一點就好少人講。

 

藍友斑唔係咩家財億萬貫,手頭上有兩個單位收緊租,都係早年買落,各自都供咗七成,位置就唔多講了,總之一間收緊萬五蚊,另一間收緊萬三蚊,唔係咩大單位,屬兩房一廳上車盤,買返嚟係純投資用途,藍友斑買入呢兩個單位後,就無加過租客月租。計番條數,根據我個屋苑而言,呢兩個單位其實各自收少比市價低的三、四千蚊,點解唔加?因為我真心覺得,樓宇除咗係一項投資項目,佢更應該係一份人情味。

 

或者講下租客家庭A,是一男一女的教師夫婦,屋企無小朋友,只養一隻波斯貓,佢地並無置業,一直都係租樓住,藍友斑同佢地識咗兩年時間,大家平時係朋友咁,當然唔係話好熟,但我真心明白對於唔少家庭而言,住屋使了大部分錢,而呢對couple好企理,第一次上過去睇間屋時,佢地已經住咗幾年,內籠仲好似新嘅一樣,係個冷氣壞咗未換,佢地話之前個屋主一直唔肯換冷氣,所以就開住房個部先。

 

大佬,房嘅冷氣得個一匹,邊夠廳用?藍友斑第日就即刻叫師傳上去換咗個全新的兩匹冷氣,等佢地好住啲,兩位老師都表示好驚訝,或者佢地都覺得呢個後生仔幾friendly,於是大家就開始熟,熟客租開,大家都好地地,藍友斑又唔係等個兩、三千蚊使,請你話我知點解要加租?

 

「哈你唔加租就係你傻仔啦,仲扮晒慈善家。」曾經有地產業界嘅人親口對藍友斑講呢句說話,外人覺得我傻仔都無所謂,我只係覺得,做人唔好做到太盡,凡事都留三分,讓一讓人,對人好啲,有咩所謂?我最睇唔過眼的業主,係個種恃住自己有層樓、工廈、寫字樓就蝦蝦霸霸,講句說話都尖酸刻薄過人,呢種人從來無諗過,如果唔係租客租緊你層樓,自己供唔供得起呢?人地幫緊你供樓,係一個大忙,對業主而言,應該同租客講句「多謝」添呀。

 

租樓其實好講緣份,另外一對租客家庭B,其實係新婚不久的小夫妻。

 

當時,藍友斑個單位拎去地產放租,標價萬七,屬正常市價;一個鐘後,地產打俾我話有對夫婦有興趣,希望可以睇一睇樓,咁我又無所謂,咪行多轉囉。原來呢對夫婦剛出來社會闖,仲奉子成婚,一個做marketing、一個做會計,講真,其實兩份都係辛苦唔討好嘅工作,人工搵幾多,藍友斑大概都知,而且又有個BB仔要養。兩公婆話好鍾意呢個單位,交通上近佢地返工,放工可以快啲返屋企湊BB,但佢地講萬七蚊實在太貴,希望可以講下價。

 

於是我就開佢地萬三,平四千蚊俾佢地,兩公婆聽完起初都唔信,你眼望我眼以為我開玩笑,我好認真咁講:「兩位,真係萬三,唔係呃你地。你地慳咗啲錢,用嚟養好個BB。」個刻我睇住兩公婆開心到流眼淚,個地產係我身邊呆晒,等佢清醒完就捉我埋一邊,問我「藍生你諗清楚未,呢個價位真係太低,屋苑近年從未出現過。」

 

人嘅野,就係互相幫忙,我覺得如果你係人地艱難之時,伸手幫人一把,絕對係積德積福,如果多啲人咁諗,成個世界就會美好更多。賺錢,唔一定要賺盡,但幫人,自己可以做幾多,就幫幾多囉。道理就係咁簡單,但係世上總有些好似《鏗鏘集》咁嘅 so called 業主,佢地永遠都唔會明白,藍友斑所講嘅人情味,其實是怎樣的一回事。

 

藍友斑 Bernard

 

*《斑駁陸離》逢星期二、四刊於《 香港投資日報》

 

‪#‎香港投資日報 ‪#‎鏗鏘集 ‪#‎租樓 ‪#‎樓奴 ‪#‎租金 ‪#‎加租 ‪#‎斑駁陸離

 

 

Share On
Dislike
0
租金     斑駁陸離     藍友斑     香港投資日報     鏗鏘集     租樓     樓奴‬     加租     斑駁陸離‬

發表評論