藍友斑

建築師、公司合伙人,業餘寫作,夾雜於新舊世代之間,寫盡港式生活故事。

藍友斑已經過咗萬聖落老蘭扮鬼扮馬的心境,大家鍾意萬聖節,係因為大家可以攞正牌癲喪一晚,當晚你唔需要理自己的身分,你只係一隻鬼。平日內心所受的壓力愈大,扮鬼程度就愈高,你睇齊昕個慘白女鬼look,就知佢幾大壓力。

 

話說今朝同父母去陸羽飲茶,經過已經至少三枱客係講緊齊昕摑老母,只睇標題,唔少人講齊昕此舉「大快人心」,而今朝我自己睇完條片,起初都會以為好爽,點知睇完齊昕連摑阿媽後,我個心都feel到龍蝦太嘅痛,我係一啲爽嘅感覺都無,我只感到心酸、悲哀。

如果唔係齊昕摑,而係一個憤怒嘅市民摑,或者我會覺得爽,但你想像下,當住全世界面摑你嘅,係親生女,呢鑊你無辦法只可硬食。

 

唯獨呢件事,我笑唔出。

 

我真心覺得梁太慘,唔通梁太會報警,叫差人上禮賓府捉走齊昕咩。今朝一早已經有大家讚齊昕做得好,更有人開心到要求每年要齊昕摑阿媽一次,呢班人,先係「刻毒、涼薄」。

 

齊昕個心到底點諗?我或者呢世都唔會明白,因為佢明知有人影住,都大大力咁摑咗阿媽兩把。我好難想像我會當住全世界面前摑自己父母,始終咁樣係置親情於不顧,我爸媽實傷心死,所以龍蝦太個心,依家一定好痛苦,又要應付個女,又要應付公眾,呢個第一家庭真係無得頂。

 

我太膽假設,齊昕怒摑龍蝦太嘅兩個原因:

一,齊昕平時係屋企,成日俾阿媽毒打、奚落,今次佢當住全世界面,決定報復。

二,真係如齊昕所講,龍蝦太唔係佢親生阿媽,積怨爆發。

除此之外,藍友斑真係諗唔到其他原因,要去到咁盡「公開摑老母」了。

藍友斑

‪#‎齊昕‬ ‪#‎齊昕嘅母親‬ ‪#‎梁振英‬ ‪#‎特首這一家‬ ‪#‎香港第一家庭‬

Share On
Dislike
0

發表評論