藍友斑

建築師、公司合伙人,業餘寫作,夾雜於新舊世代之間,寫盡港式生活故事。

重陽節難得休假一日,本身成班中學同學約咗去Keith屋企燒烤聚舊,屋企住西貢的Keith,擁有三層獨立屋連天台花園,基本上係聚會佳地;萬事俱備,點知Keith竟然甩底,佢係Whatsapp Group同大家say sorry,原因係要去伊利沙伯醫院靜坐。

無錯,Keith係一個公立醫院心臟科醫生,印象中佢係平輩入面最無立場嘅一個,譬如之前有咩社運大事,佢都係置身事外,但今次連最溫和的心臟醫生都要出面抗爭靜坐。大家group入面難免失望,但都支持佢嘅決定;藍友斑費時班中學同學掃興,於是就同大家講不如上嚟我屋企打邊爐instead of Keith個天台,由於大家本身已經約實,見有得轉場,當然人人ok啦。

之後大家就開始買龍蝦、帶子、肥牛上嚟,我家中有一張可供18人同時用餐的木長桌,一個二個叫埋伴侶上嚟,坐滿晒18個位,成間屋熱鬧到不得了之際,我女友Amiee突然間指住電視:「喂Keith上電視啊!」

大家即刻擰轉頭睇電視,個鏡頭hold住咗3秒左右,果然係Keith,「勁呀!佢都出嚟抗爭,今次政府真係仆街啦!」Andy突然咁講,之後全場靜咗靜,繼續忙準備打邊爐。藍友斑覺得呢個moment,要將呢件事寫底,原因係今時今日香港社會,已經淪落至連醫生都要出面搞抗爭的時勢,好唏噓。

今次抗爭嘅醫生,大部分都係無戴口罩嘅,行出嚟俾人點相,唔怕咩「秋後算帳」,你就知道佢地有幾咁憤怒。根據後來Keith的描述,原來好多大粒醫生都有份參與佔領伊院,你就知道政府今次有幾咁大鑊。講真,留得低係HA做嘅醫生,除咗一部分係新仔外,好多年資高嘅轉出私家做,隨時搵多10倍人工,但佢地仲留係公立醫院做,真係因為對社會弱勢的不忍同熱誠。講真,你問今時今日熱血、心意值得幾錢?只要你一睇醫生呢次抗爭,你就知道,係好值錢好值錢,譬如以Keith計,佢依家月入大約18萬鬆啲,但沙田某間私立醫院以高5倍人工請佢,但佢都決定繼續係公立醫院「做多排」,皆因佢明白搵錢的機會大把,佢希望趁後生可以幫多啲老弱病人,僅此而已。

所以你話,呢一腔熱誠係幾咁值錢,Keith置每年收入多幾百萬於不顧,繼續留守公立醫院心臟科,而好多好多醫生的想法同佢一樣,根據尋日的人數,起碼有1,300個醫生。呢班醫生,係香港的脊樑,你想像下如果呢1,300個醫生因為政府唔加雞碎咁多的人工,而搞大罷工,成個醫療系統癱瘓,政府就真係玩完。

當然,佢地唔會罷工,因為責任心太強,試問點會捨得病人無人理?但係今次事件反映咗一個最重要訊息:社會上讀書最叻、搵錢最多、最重要的精英都好嬲政府。據說以前有個港大舊生,都係做醫生,因為睇唔過眼當時政權,搞咗場辛亥革命。醫生,其實係社會上沉睡的巨龍,一旦發火,非同小可。

「喂,梁振英個老婆食得啦!手快有手慢無呀!」中學老死叫我番出去打邊爐,哦,原來係隻龍蝦煮熟了。

 

藍友斑 Bernard


#醫生 #抗爭 #HA #伊利沙伯醫院

*《斑駁陸離》逢星期二、四刊於《 香港投資日報》

Share On
Dislike
0
抗爭     醫生     醫院     藍友斑 Bernard     藍友斑     伊利沙伯醫院     ha

發表評論