李思行

以文會友、把歌傾情;追求真善美、常懷赤子心。

年長的一批相信,香港社會不支持任何過激或衝擊行為,主張守住和平、理性與非暴力的原則,向當權者爭取。。。”

以上句子,見於上星期學生衝入港大校委會會議會場翌日《信報》香港脈搏一文。

每次見到類似嘅“和理非非”論調,感覺就同自從有自由行小童當街或喺商場內便溺、北區大量水貨客影響市民日常生活之後,經常聽到嘅“大家要包容”基本一樣 - 講同唔講個要求/期望都係落空!至於兩者嘅分別,其中一個就係前者(應該)源自並繼而成為泛民議員嘅口頭禪,後者就源自並屬於建制人士,包括官員、議員同一啲公職人員嘅慣性說話。

先岔開一筆,四大奇書之一《西遊記》,相信未讀過都知道大概內容,讀過就當知第拾肆回《心猿歸正 六賊無蹤》,尾段講到觀音菩薩化身一老母(見西遊記原著,絕對唔係粗口),贈唐三藏一件錦布直裰,一頂嵌金花帽,並授與“緊箍咒”,說道“將此衣帽與他(孫悟空)穿戴。若他不服你使喚,你就默念此咒,他再不敢行凶”。

老母走後,悟空自東海宴罷歸來,三藏騙說“這帽子若戴了,不用教經就會念經;這衣服若穿了,不用演禮就會行禮”,悟空不虞有詐,穿戴上身,三藏隨即默念那“緊箍咒”,悟空頓時大叫“頭痛,頭痛!”並在地上打滾。

言歸正傳,悟空頭上嘅“金鋼圈”,原係觀音菩薩寶物,贈與唐僧乃係助佢「控制」呢隻馬騮,等佢“不敢越出雷池一步”。至於文首嘅“和理非非”,就唔係有咩得道高人贈與一眾泛民議員,而係唔知當中邊位首先 DIY 嘅。

咁“金鋼圈”同“和理非非”又有何相干?

前者乃死物一件,要有人念“緊箍咒”至可以發揮到佢嘅威力,亦只得戴上嘅人會受到控制;後者雖然只係一堆文字或者一句說話,但就集“金鋼圈”同“緊箍咒”於一身,兼且威力非凡,無論自身,或者身邊,甚至遠方嘅受眾,只要心生一念,都同樣“不敢越出雷池一步”。

咁唐僧騙得悟空戴上“金鋼圈”之後,邊個最高興?

傻嘅,取西經途中咁多妖魔鬼怪,有排都未輪到唐僧喇!

咁“和理非非”又同學運有咩關係?點解會成為標題所講嘅學運“緊箍咒”?

須知《西遊記》乃章回小說,所以欲知詳情,請留意俺嘅下回分解。

請呀!

Namo Woliefeifei Namo Woliefeifei Namo Woliefeifei Namo Woliefeifei Namo Woliefeifei


《信報》香港脈搏
http://forum.hkej.com/node/124632


原文發表於 思行思語 專頁
https://m.facebook.com/349247198508841/photos/a.349385918494969.1073741828.349247198508841/677482985685259/?type=1&source=48
李思行 面書
https://m.facebook.com/sixing.li?ref=bookmarks
思行思語 專頁
https://m.facebook.com/profile.php?id=349247198508841

Share On
Dislike
0

發表評論