李思行

以文會友、把歌傾情;追求真善美、常懷赤子心。

除咗植物,所有動物都要學習謀生技能,當中有一種動物「發明」咗學校;發展至今,呢種動物平均要花上生命中三分一嘅時間去返學,相對上比其牠動物嘅學習時間都要長(如果喺成長過程中無俾其牠動物食咗嘅話)。

照計學習時間愈長,謀生技能/生存能力就愈高,但踏入廿一世紀之後,生存條件同樓價一樣,往往跑得快過返學所學到嘅技能。

另一個同學校有關嘅情況就係近年每逢中小學放榜、派位、幼兒班招生等「重要」日子,新聞記者都如常去走訪一啲學生、家長。

前一晚就喺一個媒體睇到分別有一位學生話要多謝補習社嘅老師,「因為我覺得佢仲辛苦過我,佢成日都要鬧我」、一位就話放榜前一晚擔心至瞓唔到,更緊張到「標冷汗」; 噚晚就喺晚間電視新聞睇到一位獲派第一志願嘅學生,但見佢歡天喜地之餘更激動到對住鏡頭不停咁喊,話要多謝媽咪,因為媽咪為咗佢嘅考試請咗個多月假嚟陪佢一齊溫習云云。

至於再早之前嗰位喺鏡頭面前話佢考到入名校個仔“平日唔係好多補習,只係會上乜乜物物柒玖幾樣學習班啫”嗰位家長,相信大家重記憶猶新,不贅。而為咗子女能夠入讀名校不惜工本,豪花七位數買債券、喺名校區置業又或者通宵排隊為求一個面試輪籌,就更係時有所聞(教育政策同學位問題,不在本文討論範圍之內)。

點解近呢十幾年不單止人人都話要「終身學習」(鼓吹呢樣嘢嘅前高官唔知係有心靠害定係癡線嘅),重要「闔家讀書」?除咗上面提及嘅「請假陪子女溫習應付考試」例子之外,相信大家,包括唔少老師同校長,都知道有唔少幼兒生、小學生嘅勞作、功課係家長(整份作業或部份)替槍嘅!

動物之所以要學習係因為要生存、要適應環境、要抵抗、逃避(非同類)捕獵者襲擊、殺害,但唔知係咪因為人類已經貴為「萬物之靈」,自覺除咗同類,其牠動物已經無威脅,再加上可能真係人口太多、資源有限(問題出在人性貪婪,時刻追求擁有多過所需嘅),所以要互相競爭,要將同類「砌低」嚟爭取生存空間。

學習嘅本意係提升競爭力、提高生存機會,而人類就至少多咗兩樣 - 追求智識同以求學成之後有一個美好嘅生活(白啲講係增加搵錢能力),但喺畢業之前(終身學習又何來真正嘅畢業)嗰廿幾甚或三十多年,對或多或少嘅學生以至家長嚟講,其實係一個漫長嘅折騰階段但好似當中又有部份人「甘之如飴」?!


原文
https://m.facebook.com/349247198508841/photos/pb.349247198508841.-2207520000.1436369286./668429356590622/?type=1&source=54&ref=bookmarks
李思行 面書
https://m.facebook.com/sixing.li?ref=bookmark
思行思語 專頁
https://m.facebook.com/profile.php?id=349247198508841&ref=bookmark

Share On
Dislike
0

發表評論