上篇講到發生左啲唔如意既事,今個星期都繼續困擾住我,唉,搞到成個人好煩,加上又忙於打工(黎工作假期唔工作,好快可以返香港),所以又隔左咁耐先再寫到一篇。今次講下去新特蘭既主場:光明球場!

 

雖然講唔上係咩攻略,但都有啲私人心得比大家。其實今次去呢個TOUR,真係有啲火滾,因為為左呢個TOUR,我地由紐卡素市中心足足去左四次!係四次,先去得成呢個TOUR!車錢都夠我入多去兩次喇!點解會搞成咁呢?

 

第一次,我地去到諗住買飛行TOUR,點知接待處個人話無飛賣,要去球場門口既TICKET OFFICE買,我地行返去,收左工,無計啦,下次再黎;第二次,去左買飛喇,諗住買完飛入去,去到接待處,又唔入得?原來黑貓既TOUR好貼心,一定會安排專人黎帶你行,同埋為你講解既,即係要預約,無預約就拜拜喇,即係你買左飛,但無預約,你張飛都只係一張廢紙,咁我地問左賣飛既職員,佢話最快要下一個星期二兩點鐘先有TOUR,叫我地打去約啦,個電話仲係付費電話,即係要另外再比錢入電話咭先打得果隻!仲打左五六次都係遺言信箱,SORRY,留言信箱。

 

咁打唔到唔通唔洗去咩,於是我地去第三次,就係下一個星期二,去到問係咪有場兩點鐘TOUR呢,真係有喎,咁接待處職員叫我地等下啦,等了又等,等到花兒也謝了,終於有個伯伯係辦公室行出黎,拎本點名簿,叫我地留低名同電話,然後同我地講:黎緊星期六有一場,兩點鐘,一點九好黎到喇,嗯,你地走得喇。下?下下下下下?我又洗左咁多錢買車飛黎,原來只係黎預約時間?我頂!

 

結果第四次,就係果個星期六,我地終於成功去到個TOUR。點解我會咁炆呢,因為係紐卡素市中心搭地鐵(即係METRO)去新特蘭,橫跨左地鐵既A、B、C三區,新特蘭直頭係C區,咁車錢就係最貴果隻,英國啲車錢貴就出左名架喇,不過佢比港鐵有人性,就係你買日票,一日任搭果隻(DAY SAVER),都平過你買來回兩程,即係只要你一來一回,買日票就抵返哂,而A+B+C區既全日票係4.6英鎊,你買一張,紐卡素地鐵就全日任搭,你去多啲地方就抵啲。

 

上左地鐵你就會望到有個站係叫STADIUM OF LIGHT,看字識落,傻既都知呢到落啦,落車行大約十至十五分鐘就係到球場停車場入口,就比較近賣飛既地方,但如果你已經有飛可以直鏟球場,過一個站既ST. PETER站行過去就會近啲,大約十分鐘到。

 

所以我比大家小小意見,基本上你去兩次最穩陣,第一次晨早去到買飛,然後去球場辦公室話要BOOKING,之後再跟佢比果日黎行TOUR,咁就唔洗特登入錢打佢個付費電話同埋走幾轉冤枉路喇。

 

至於TOUR行左啲咩,關於新特蘭既小知識,仲有點解花名會叫黑貓,下篇再同大家分享。(不過呢啲上網都會搵到既哈哈哈)

Share On
Dislike
0

發表評論