Relgitsjg—史兄

80後,機緣巧合成為第一代博客,博客群組《香港原人圈》成員之一。

唔知開埋公司名會唔會畀人告。不過算啦,賤命一條。下文包含事實,同我個人嘅認知,寫作過程力求客觀公平,並無意作任何惡意猜測及中傷。

 

────

 

上星期,信報頭版有一則唔起眼嘅新聞,講翠華(1314)提早喺今年9月退返尖沙咀赫德道嘅舖位(註)。

- 舖位由翠華大股東李遠康老婆旗下公司持有;
- 翠華自2014年10月起以每月30.3萬租金租用該舖;2015年9月起減租至20.3萬。屈指一算,截至今年9月,翠華共付出537萬租金(首兩個月免租;然後9個月*30. 3萬+13個月*20.3萬);
- 張租約原本喺2017年10月到期。

 

呢個係持續關連交易,已經報咗畀HKEx知,合法嘅。根據佢有關退租呢個通告,佢指退租係由於:

「赫德道物業由本集團用作經營以「翠華餐廳」為名的餐廳。由於香港零售行業近期不景及中國內地旅客數目下跌導致該餐廳需要更長時間填補資本開支,故優領訂立終止協議。董事局認為訂立終止協議不會對本集團的業務及營運構成任何重大不利影響。」

 

參考文件:終止持續關連交易

 

───

 

我見到呢張通告,真係哈哈哈大笑三聲。

 

我住喺尖沙咀,仲要住呢間翠華住得好近,所以呢間舖位嘅狀況,我知得非常非常非常清楚:

 

1. 赫德道呢間舖位,地下一樓兩層,前身係酒吧。呢間翠華自2015年年初開始營業,生意一直好差。生意差,因為食物差、冷氣差、服務差。啲奶茶,苦嘅凍嘅。冷氣時熱時凍,仲要坐入啲都收唔到電話。每次經過,啲員工都拍烏蠅同圍埋吹水,完全唔理啲客。隔離寶勒巷有兩三間茶餐廳,嘢好食過佢、啲待應醒過佢,價錢平過佢。你係想像唔到一間喺尖沙咀嘅翠華,生意可以差到咁。

 

可惜佢嘅年報無交待個別舖位嘅生意,所以講唔到實際有幾差……不過更重要係……

 

2. 印象中,自從2015年7月、8月開始。呢個舖位已經無做生意,拉埋門暫停營業。我唔敢講實係咪7、8月,但大概係暑假呢個時間。

 

生意差,可能係呢間舖唔開門嘅其中一個原因。

 

不過,另一個佢無講、但可能同樣重要嘅原因,就係呢個舖位嘅二樓天花會漏水。只要落少少雨,二樓就會表演水舞間加盧山大瀑布咁,水長流。一流,成間舖都做唔到生意。(上文當然有誇張成份。親眼見過水長流,可惜無相)

 

呢個漏水問題,上手酒吧知,亦領過嘢;而翠華大股東老婆買呢個舖嘅時候,可能都會知道。(呢兩點我無法證明)

 

知唔知都好,落雨一埋牙,無得走、見真章。夏天為大地帶嚟雨水,一到六七月,翠華呢間舖就仆街,日日喺尖沙咀店內上演水舞間,根本做唔到生意。呢點亦疑似解釋咗點解間舖七八月開始就無做。唔係無生意,係做唔到生意-除非翠華可以100%預知幾時落雨同漏水。

 

3. 翠華有無試過去解決漏水問題呢?有。但成唔成功解決呢?如果成功,仲使唔使退租呢?

 

4. 好咧,講咗咁耐。問題喺邊?有幾樣:

 

第一,納空租。如果翠華一早知間舖做唔到生意,站喺股東嘅角度出發,公司一早要同業主反枱,要佢搞掂漏水,否則唔會交租。根據〈持續關連交易租賃協議〉,業主係要付「資本性質」嘅開支。而常理話我知,你去租樓,層樓穿咗漏水,梗係業主搞,搞唔好輕則免租、重則賠錢。邊有可能仲要個租客納租?

 

如果真係納空租,翠華一最遲喺2015年8月已經開始納空租,到今年9月,就會納咗14個月共294萬租。呢14個月,係一毫子生意都無做過。由於大股東持翠華約三分二股份,即係294萬喺由左手(大股東)轉右手(佢老婆),餘下嘅由小股東找數。即係話,小股東白白畀咗約100萬阿大股東嘅老婆。

 

租層爛樓出去,唔使賠,仲有錢落袋。真係多謝晒。我代佢老婆多謝啲小股東。

 

100萬,好少錢啫。翠華市值17億,100萬又算乜呢?哦,好呀,既然錢少,叫業主嘔返出嚟囉。你奶茶收得貴、炒粉面飯唔好食,市場demand supply,你有名氣啲人都肯畀錢,無人吹得你漲。但你呢啲行為,真係袋錢都袋得唔安落。

 

第二,選擇性披露。間舖唔做,佢嘅結構同建造質素有問題似乎亦係原因之一。而畀HKEx張通告,只係選擇性咁講咗同「零售行業近期不景及中國內地旅客數目下跌」有關。有無犯法呢?哎呀,法律嘅嘢我唔識喎。但如果漏水係真嘅,咁樣講啲唔講啲,咪不盡不實囉。

 

仲有,佢唔講,下手買家都未必知個天花會漏水啦。點解我會知佢會放盤?我估嫁渣!每個月白袋20萬,你唔袋?袋咗一球之後咁好心地中止租約,仲有一年錢都唔袋?而家樓市下滑,個市又差,袋完、搵完人笨,仲唔拿拿臨放盤走人?希望下手買家得閒上下網,又望到呢篇嘢啦。哈哈哈哈哈。

 

完。

──────────────────

廣告:求包養支持!
(1)廣東話入文,全港第一本廣東話範文:
《香港語文-聽陳蕾士嘅秘密》林非、史兄、擇言、Edwin
https://www.proj.hk/CantoneseModelEssay

(2)史兄新書《史詩式愛情》,已經正式上架
https://goo.gl/hvCG2E
──────────────────
不要問,只要like,仆街史兄的專頁同IG。
Facebook : https://www.facebook.com/Relgitsjg
IG (主要用嚟睇女仔) : https://www.instagram.com/iamuncleshit/
──────────────────

註:http://www1.hkej.com/dailynews/headline/article/1329746/翠華尖沙咀舖提早退租​

Share On
Dislike
0
翠華     史兄     Relgitsjg - 史兄     Relgitsjg

發表評論