藍友斑

建築師、公司合伙人,業餘寫作,夾雜於新舊世代之間,寫盡港式生活故事。

插Boss的勇氣│藍友班

 

若你有看《House of Cards》的話,一定對Francis Underwood如何不擇手段、用盡權術為求做總統的經歷極其深刻,這位逐權者在劇中金句連連,其中season 3有一幕令藍友斑印象很深,就是Francis的妻子(Claire,美國第一夫人)在美俄的外交場合上,突然爆肚就同性戀議題插爆俄羅斯總統,令本身美俄兩國已經傾掂數的協議,一下子化為烏有。

 

當然戲劇世界難免有啲誇張,今時今日,你好難想像奧巴馬老婆會公開罵爆普京,但係辦公室之中,大家一直都對呢對呢個議題三緘其口,老闆永遠是對的?你夠唔夠膽公開係會議之中,插爆自己上司?

 

或者大家都慣咗工作上逆來順受,即使老闆要求幾唔合理,你都會笑住say yes,你可以做嘅,多數就係搵番幾位比較close的同事,趁lunch time出去食飯時呻下罵下就算,講真,邊個敢同老闆頂頭作對?嫌命長咩?

 

藍友斑其實有少少身同感受,因為最近我由打工仔升做合夥人之後,發現身邊同事對我的態度開始唔同了,本身大家都可以一起出去食飯食Tea,依家多數都自己一個食;以前我只係個阿頭,但依家大家除咗覺得我係老闆之餘,同埋係大老闆條針,我好理解「伴君如伴虎」的道理,所以對於呢個轉變,我只能默默接受。

 

當我以為老闆同員工之間永遠溝唔埋之際,但我最近遇到一間公司,裡面嘅文化真係令我「長見識」。

 

上星期,我去一間媒體公司開會,主要係傾樓盤宣傳合作,由於呢單工程,大老闆都有份投資,所以我代表佢去involve埋宣傳個部分;btw唔記得講,呢間係一間外國公司。上到去佢地寫字樓,門口掛咗一大塊牌,用英文大大字寫住 "Fault of the Week",之後下面就寫住唔同員工對公司的不滿,譬如我見到有一項係寫「公司點解可以送水送遲咗?」,另一個就寫「老闆,你係公司傾計唔好咁大聲,好嘈。」我覺得最神奇嘅,係呢間公司夠膽將自己員工意見掛係門口之餘,而且個個寫完都有署名的,足見老闆的氣量。

 

另一邊廂,亦掛住一塊 “Virtue of the Week”,大家都老實不客氣,係板上面寫對同事好人好事的睇法,譬如有一個post係講「廁所有一格塞咗,老闆即刻叫人修理」,另外有一個係明串老闆嘅,「近排老闆注重健康,少咗請大家食下午茶。」我來自傳統公司,對於呢種別開生面的公司文化,真係大開眼界。

 

終於見到呢間公司老闆Jeff的真面目了,佢係一名英國人,比我想像的年紀還要老,言吐舉止的確gentlemen,佢見到我望住個Virtue board,一開口就講笑咁用唔咸唔淡的廣東話問我「係咪想食下午cha?」原來佢識講廣東話,我笑住問「係咪你請先?」佢好鬼馬地細細聲同我講「Sure~」,示意我唔好俾其他員工聽到。

 

之後佢秘書就同我行咗公司一轉,入面有張乒乓波枱同桌球枱,仲有PS4、Wii之類的遊戲機,我問平日佢地真係會玩?Jeff就搭咀:「梗係唔會啦,買嚟擺,those made you think that we are funny and creative, right?」哈哈,的確。

 

而最令藍友斑「震驚」嘅,係開會期間,Jeff口快快講錯一樣嘢,有位下屬即刻以0.1秒的反應,直接指出老闆的錯誤,仲叫老闆以後講到呢個位時要小心啲,唔好成日都講錯;由此可見,呢間公司真係無大無細,啱就讚錯就彈,話知你係老闆。

 

藍友斑知道,如果要下屬擁有插Boss的勇氣,最重要係老闆要有胸襟同器量,有雞先有蛋;近年呢種新公司文化愈來愈盛行,諗深一層,或者係因為呢種文化,更合符辦公室的人性吧。

 

*《斑駁陸離》逢星期二、四刊於《香港投資日報》

 

藍友斑 Bernard

Share On
Dislike
0
斑駁陸離     藍友斑     香港投資日報     斑駁陸離‬     HouseOfCards     腦細     插腦細     Boss     插Boss

發表評論