政府剛推出全民退休保障諮詢,俾「有經濟需要」同「不論貧富」兩個方案大家揀。老實講,A餐B餐都係屎,只係一嚿冇咁臭。但係咁,香港人係咪真係要淪落到屎唔臭都食住先呢?

 

不過,未使諮詢,大家都好清楚政府想你揀邊舊:先喺字眼上做手腳,引導好緊張「李嘉誠都有份攞」嘅市民;文件中,條數計到兩個計劃政府額外開支相差十倍,再加埋「加稅」兩隻字,中產或者偽中產聽到都怕;今朝「好打得」嘅林鄭更赤膊上陣,示範點樣人格謀殺。

 

政府話諮詢文件中「不論貧富」方案,係參考港大榮休教授周永新嘅建議。林鄭喺電台節目話,「不論貧富」方案唔開徵新稅或加稅都係不切實際。佢又話,冇收過周永新提交加入資產及離港限制嘅建議,仲話周教授呢啲講法好隨意,唔係「認真學術研究的應有態度」。

 

小編認為林鄭先唔知咩係「學術研究」。林鄭講及周永新就高額退休金公務員不可領取全民退保建議時「一度發笑」,又好武斷咁話周永新「對公共財政掌握卻不夠透徹」,再補充話「不斷作出調整數字」改善方案唔係政府做事嘅方法。

 

將高收入人士撇除於全民退保受益者,林鄭唔係一直支持咩?點解一講到公務員就轉哂口風?有少少統計學概念嘅人都知,未來發展變化萬千,當然要靠不斷調整數字去計算出一個可行嘅計劃出黎,然後林鄭你話呢個唔係政府一向做事方法?咁唔怪得高鐵機場三跑明明蝕大本,你政府都死揸住條舊數去起,唔蝕夠幾千億死唔甘心。

 

剩係呢啲咁嘅官僚態度,小編響度大膽講句,林鄭響學術態度上肯定零分。

 

再同大家講吓常識。依家政府計到「不論貧富」條數咁恐怖,先唔講呢條數有冇問題,加入資產及離港限制絕對係值得考慮嘅建議:資產限制訂到五百萬,肯定有效率易實行過你個八萬元「有經濟需要」方案;離港限制一向應用於生果金等等嘅福利政策,亦唔係咩新鮮事。呢兩個建議又有幾「隨意」呀?

 

由一個高官口中咁樣批評一個學者,話人冇「學術研究的應有態度」,咁樣人格謀殺法,道理好簡單,就係任何形式嘅「不論貧富」方案一定要瓜,靠嚇靠惡都唔可以俾全民退保搞得成,頂多俾個比個同攞綜援條件差唔多嚴格嘅「有經濟需要」方案應酬下你班刁民 ... 但咁樣係叫「加強版綜援」喎,同退休保障有乜嘢關係?

Share On
Dislike
0
林鄭月娥     全民退保     周永新     不論貧富     有經濟需要     今日米路     學術研究

發表評論