由結論說起,《星球大戰:原力的覺醒》係一套由一個星戰撚拍比另一班星戰撚睇嘅戲,雖然星戰撚未必鍾意。

 

點解好似講得咁矛盾呢?最近睇緊Christ Taylor本《How Star Wars Conquered the Universe》就曾經講到,新一集星戰要拍得成功,就一定要敢於破除對George Lucas嘅祟拜,否則係唔會開創倒星戰發展嘅新道路出黎。而好明顯,J.J. Abraham就係徹頭徹尾嘅星戰Fans,而《原力的覺醒》就係佢對Lucas一個致敬嘅儀式。

 

當你見倒一開場劇情就響沙漠展開、又有商人又有酒吧,然後又有新Death Star又係要飛入條隧道去阻止佢發戲,然後又有父子/師徒對決然後又有機械人收埋D秘密又要走去救「公主」,其實睇睇下我甚至覺得佢不過係將第一集嘅劇情修修改改再推一個翻版拍Only。

 

當然,呢種拍法對於星戰呢種被期望咁大嘅經典黎講,係最保險嘅選擇,畢竟對於大多數星戰迷黎講,見倒Harrison Ford攬住Carrie Fisher嘅時候,你可以唔眼泛淚光嗎?當你見倒Mark Hamill再次以Skywalker身份出場嘅時候,你可以唔起雞皮嗎?不過企響吹毛求疪果一面時,我仍然稍嫌J.J. Abraham太過想討好星戰迷之餘,又唔想令新觀眾難以投入呢個新系列,所以故事難免太過簡單平面,無果種我期望嘅開創性……希望響呢套作品頂住各種期望嘅壓力後,下一部曲可以更放膽去拍。

 

另外仲有兩樣嘢想講:首先我諗大家都會奇怪,明明上集要搞掂咗個黑帝,連黑武士都人之將死、其言也善埋,點解今集呢隊First Order又會咁勁抽,仲要一嘢收咗新生Republic皮咁犀利?呢個可以話反映咗拆大台同斬首策略嘅迷思:當你以為消滅咗最具象徵性嘅領袖或者拆咗大台就會令到組織潰散呢個概念經已唔Work:由遠至阿蓋達ISIS近至香港民主運動,都係呢種新潮流嘅引證。

 

又,今集《原力的覺醒》擺脫左「王子救公主」(雖然王子同公主係兄妹)嘅俗套,唔單止個王子變咗黑人,甚至黑人王子最後倒番轉要個公主救番。我諗女性主義者一定睇得好開心。其實我自己亦唔反對呢種設定,因為男女刻板嘅定位已睇到人好悶,再加上我以為可稱為「小Keira Knightley」嘅Daisy Ridley好戲過John Boyega咁多,呢種舖排亦係相當正確嘅選擇。

 

至於果件新黑武士Adam Driver成個石內卜咁……不予置評。

Share On
Dislike
0

發表評論