藍友斑

建築師、公司合伙人,業餘寫作,夾雜於新舊世代之間,寫盡港式生活故事。

踏入11、12月,係全年結婚高峰期,面書上一個又一個書友結婚,而藍友斑可說是逢請必到;每次收到請柬,我就咁諗,人地suppose一生人一次,畀面出席係要嘅。人情方面,我好老實,記得之前有啲報道講香港人情酒席公價,我就永遠俾報道上面嘅公價多$300,好熟個啲老死就另計。

 

雖然話結婚死計爛計好肉酸,但講真,啲錢使咗就係使咗,使少啲,用番係自己平日生活到,呢種心情可以諒解。總之,你和另一半有幾大個頭,就戴幾大頂帽,通常結婚最後搞到結唔成個啲,都係因為夾硬要戴頂大帽所致。

 

一個人最光輝嘅時刻係幾時?好多新人會覺得係結婚個一刻,但我係林林種種嘅婚宴上,同好多結咗婚嘅朋友傾開計,講笑咁講,個個都話結婚之後,佢地就開始後悔。唔少人話結婚係戀人嘅墳墓,冥冥中又可能係真,如果唔係,點解十個有九個,都係咁講?

 

「諗番起當日舟車勞動爬山涉水為咗影婚照,成件事真係白痴。」Sam如是說,btw,我係中學同學婚禮入面,又撞番晒啲已經結咗婚嘅同學,一個二個係人地婚宴上,講搞婚禮係浪費時間浪費生命,真係應景到不得了。「喂喂大家睇下,Sandra播成長片段啦!」舉頭望去,又係用PowerPoint做的成長幻燈片。

 

點解結咗婚,反而無結婚前咁開心?呢個問題藍友斑間唔中去廁所時都有諗下,歸根究底,都「成家立室」呢個最現實嘅問題。

 

香港人拍拖,好多時候一開始,都係同父母住,大家見面一係係街,一係就係屋企同父母一齊,好少機會係兩個人單獨住一段長時間,呢個係好現實嘅問題,試想下,如果你係兩邊家長,邊會捨得俾自己個仔女出面租樓同另一個人同居?錢嫌多嗎?所以去到最後,大家真係決定要結婚,求婚、見家長等所有事做齊,先至會開始諗俾首期買樓或者出去租樓,換言之,你同另一半相處時,好多時候,都未必睇到對方真正嘅一面。

 

人前人後兩個人,現實好多時都係咁,你以為John係好姿整好企理?Sorry,佢係屋企從來唔執屋從來唔做家務,下?John結婚前唔係咁?你都傻嘅,你同John住咗幾耐?有無連續一星期?你有無同John試過交水電煤、甚至房租、月租車位?

 

土地問題,就係結婚嘅真正問題所在,如果我地個個都有層樓自住嘅,咁結婚就唔再係一個大問題,當然現實中無可能發生。所以,婚姻之所以成為大部分人口中愛情嘅「墳墓」,就係因為婚姻令雙方赤裸裸地,再一次認識對方;所以結婚前,情人們真係要有被嚇怕同嚇怕人的準備。

 

因此,我必須向大家宣佈一個消息,是的,我決定同女友Amiee邁向人生的另一個階段,藍友斑已經同Amiee一齊生活過,大家都覺得可以遷就到對方,大家都已經嚇怕過對方,習慣彼此的喜和惡,我們都認定對方是各自的missing piece;去到呢個位,你可能覺得中伏,原來藍友斑成篇文,係想講自己已經ready要結婚,仲特登用了一整篇專欄的篇幅,嚟同女朋友示愛。

 

各位師兄師姐,結婚呢件大事,一生人得一次,而難得我有個專欄,公器私用一次咁多,唔好忟,好嗎?希望大家祝福我和Amiee。

 

我唔會咁老套,祝各位有情人終成眷屬;我會祝大家-有情人別盲目地走進墳墓。結婚之前,諗清楚,是否真真正正,徹徹底底地了解,和愛對方,但願大家結婚後,都會覺得婚禮上的自己,就係人生中最光輝嘅那個我。

 

*《斑駁陸離》逢星期二、四刊於《香港投資日報》

藍友斑 Bernard

 

封面圖片:Mike M

Share On
Dislike
0
愛情     結婚     藍友斑 Bernard     斑駁陸離     藍友斑     香港投資日報     斑駁陸離‬     墳墓     戀人     婚宴

發表評論