小編細個讀書果陣,學校都會有優惠訂購南華早報SCMP嘅服務。果時為學英文,或呃自己學緊英文,都會訂一份,雖則份報紙最後都係拎去墊煲底。今時今日,網上高質英文新聞應有盡有,南早銷量已經大不如前,係其中一份隨時死嘅紙媒。點知,早幾日《紐約時報》報導,阿里巴巴將以20億收購南早集團(0583)旗下嘅媒體業務,包括報紙業務、雜誌、招聘、戶外媒體、活動及會議、教育及數碼媒體業務。

 

一般嘅分析,加上阿里巴巴自己都咁講,買南早係想利用呢個歷史悠久嘅英文媒體品牌,向世界唱好中國。

 

不過,美國傳媒呢幾日嘅報道有啲唔清楚。佢哋引用南早2013年停牌前嘅市值27億,但呢兩年南早業績麻麻一直兼停牌,呢27億唔知剩番幾多。仲有,阿里巴巴出價20億,唔係成間南早買哂,只係買南早同媒體有關部分。據今日的公告,呢部分估值約6億。即係話,阿里巴巴出20億買賣價值6億既媒體。出手闊綽,又唔怪得人有咁多揣測嘅。

 

咦,如果媒體值6億,咁南早剩低嘅係乜,點解兩年前可以值27億?

 

小編搵番南早2014嘅公司年報睇睇,發現公司值錢之處,在佢哋擁有嘅物業:「投資物業組合包括於電視城的空置物業,以及位於美國銀行中心、高輝工業大廈及海景大廈之若干樓層」,以2014年年尾市值計算,呢堆物業已經值超過17億!不過,呢啲物業冇賣俾阿里巴巴,而只剩下物業嘅南早第日會做乜亦係未知之數。

Share On
Dislike
0
阿里巴巴     南華早報     今日米路     南早

發表評論