尋日經民聯同好幾個商界團體舉辦強積金對沖機制論壇,有份出席嘅中大前校長、經濟學者劉遵義建議政府推出失業保險(unemployment insurance)以及殘疾保險(disability insurance),用以取代遣散費和長期服務金,保障勞工之餘,又解決對沖問題。

 

先講下背景。勞資雙方而家為對沖爭拗緊,事緣梁振英要為競選承諾「找數」,取消一向用嚟抵銷長期服務金同遣散費嘅僱主強積金供款,即係要僱主負責5%強積金供款之餘,再負責果兩筆金額。僱主當然嘈到拆天,因為當初應承搞強積金,條件之一正係呢個對沖機制,而家政府擺明違背承諾。勞方又唔肯過你,理由係對沖「剝削」咗打工仔好多年,要爭取攞番工人應得的僱主供款。

 

響美國生活多年嘅劉遵義,建議嘅正係美國嘅兩種保險。失業保險有效期為6個月,失業人士可以攞番一半左右人工做生活費。至於傷殘保險,有效期更長金額更多。

 

呢兩個建議有幾可行?首先,呢個係「保險」,當然要僱主以交稅形式夾份支持。先唔講經過啲錢經過政府會製造幾多浪費,僱主肯唔肯交多一筆新稅?僱主肯乖乖交多一筆新稅,就唔使搏哂命出嚟反取消對沖啦。唔叫僱主交,錢又從何來呢?

 

仲有,美國經驗話俾我哋聽,呢兩種保險都面對好大嘅政治壓力,尤其係經濟差之時,勞工團體就會施壓擴大保險範圍。好似傷殘保險咁,領取嘅人數佔人口比例愈來愈多(以愈來愈難撈嘅低技術工人為主),傷殘嘅定義愈來愈寬鬆,金額愈來愈豐厚,依家一年總開支大約2000億美金!政府成日話怕結構性財赤,劉遵義建議嘅係加多兩舊「升值潛力」豐厚兼複雜嘅「結構」入去,政府當然係諗都唔會諗啦。

 

封面圖片:http://www.bpahk.org 經民聯網頁

Share On
Dislike
0

發表評論