大家見立法會一班老人家唔識科技,但又要討論好響時代尖端嘅網絡23條,覺得好離譜。不過,更離譜嘅,係掌握大權嘅官員原來冇乜知識,管果樣唔識果樣。今日主角,就係「攞命陳」陳德霖總裁。

 

前排陳總裁發表演說,順便提到聯繫匯率下強美元為香港帶來嘅衝擊。話說今年港匯強勁(加埋呢幾日人民幣貶值就更加係),好多人擔心香港嘢太貴影響旅遊同零售業。陳總裁好政治正確,梗係要為聯匯辯護,話「沒有實質數據顯示近期訪港旅客的人數和消費額下跌與港元匯率有直接關係」。雖然港元升得快,「但一些理由與旅遊直接相關的商品和服務價格卻錄得更大跌幅,如首飾和鐘錶價格跌了8.2%,酒店實際平均房租跌了15.3%,已經足以抵銷港元升值所帶來的影響」,即係話港元升得勁但價格跌得仲勁。

 

大家先諗一諗,陳總裁講嘅有乜問題?

 

首先,單憑幾個數字,當然唔可以證明港元同旅遊零售冇直接關係。依家港元貴,內地客寧願去其他國家吃喝購物,各種旅遊有關嘅需求下降,商戶就唯有割價求售。例如,你開酒店每晚1000港元,而家港元升(即係相對人民幣跌),你唯有打個八折先冇咁多空房。呢個唔係商戶「抵消」影響,而係需求跌零售旅遊業都搵少咗呀!當然,加上內地經濟放緩,價錢跌得仲勁,生意仲淒慘。陳總裁,價錢跌得勁唔係好事呀。

 

真攞命!呢個年薪近千萬嘅陳德霖,管緊大家血汗錢累積成嘅千億外匯基金,可以犯啲咁嘅低級錯誤,真係要減你至少幾成人工先可以抵銷一下咁小學雞錯誤嘅影響。

Share On
Dislike
0
陳德霖     美元     金管局     今日米路     港元     聯繫匯率

發表評論