Relgitsjg—史兄

80後,機緣巧合成為第一代博客,博客群組《香港原人圈》成員之一。

呢篇係個人感想及經歷,絕非選舉廣告。如果你想知點解可以make a fucking difference,麻煩跳到中間【What you can make a fucking difference】。

 

───

 

2015區議會選舉:11月22日,即係嚟緊嘅星期日。你唔記得?唔出奇,因為香港絕對係一個反智嘅地方,絕對唔鼓勵你去投票、參與公眾事務。

 

特首選舉…...絕大部份人無份投票。

 

而一般人有得投票嘅立法會、區議會,政府同建制派嘅人,都唔想推高推票率。只係淨係佢哋啲鐵票去投,勝算大好多。

 

區議會功能薄弱,基本上無人理(請在三秒內講出你區內所有候選人姓名)。

 

不過,但我會。

 

呢篇文係講一啲去咗參選區議會、我喺現實世界識嘅朋友,同簡介佢哋同我有乜淵緣。

 

-鄺葆賢:我識咗阿葆接近10年,由xanga年代已經識……真係識咗好耐。阿葆正職係個醫生,空餘時仲讀緊個法律學位……我同責任主編成日講,阿葆真身其實係超人嚟。如果為錢,我諗阿葆可以唔使走出嚟選。佢想make a difference。

 

-游蕙禎:基本上,據我理解,游主任係一個男人嚟。我已經儲好一套游主任嘅宣傳刊物(直版,可J),選舉完咗就會拎出嚟拍賣。

 

-楊繼昌:我透過乜嘢讀男讀女讀書會,認識楊繼昌條冚家剷。我喺呢個讀書仲識到好多神人。我講過,舊年七一後凌晨,我同某個朋友一齊畀人喺遮打道拉咗。

 

嗰個朋友,就係楊繼昌。

 

-中出羊子:即係羊子。你可以當佢騎呢,但起碼佢做事認真過好多候選人。佢係真正肯走出嚟參選嘅城邦派人士,唔係淨係做鍵盤戰士。淨係呢一點已經值得尊敬。

 

如果今屆區議會選舉無咗中出羊子同游蕙禎,我估知道今年區議會嘅人,再少起碼30%。

 

我原本想寫埋梁金金條仆街,不過,原來我唔識佢。

 

以上呢個組合,堅係騎呢,有本土派,又有傘兵,仲有中華膠……一個騎呢人就有啲咁騎呢嘅朋友。

 

──

 

【2015區議會選舉:11月22日

 

(本人並非任何候選人競選團隊,此亦非競選廣告。本人、親屬及女友並無透過此文章得到任何人士或團體的現金或實物回報。為表公平,以下為本人朋友所屬選區及候選人)

 

黃埔東候選人:羅錫明、梁美芬、游蕙禎

黃埔西候選人:鄺葆賢、劉偉榮

鶴園海逸候選人:楊繼昌、余志榮、蕭婉嫦

櫻桃候選人:林浩楊、鍾澤暉、中出羊子

彩園候選人:蘇西智、梁金成】

 

───

───

───

 

以下文字同上述無關。

 

【What you can make a fucking difference】

 

如果我同你講,香港選舉無種票、無賄選、無誤導,無啲仆街一車車車啲阿公阿婆去投票(呢個「一車車車啲阿公阿婆」盡顯廣東話精髓),我係呃鳩自己滾鳩你。某程度上,大陸啲選票仲乾淨過香港嗰啲。

 

大家每逢選舉就講:老人家畀人夾去投票。哦,乜啲阿婆阿公全部無親戚?投建制派嗰班人,一個二個都冇孫冇姪、無兒無女?佢哋就係冚家票投中國共產黨,無例外嘅?

 

問你自己:一個孫仔打畀阿婆,叫佢投甲君,具感染力啲;定係某某街外人叫佢投乙君,具說服力啲?

 

───

 

2012年立法會選舉,投票嗰日,我打咗四個電話。

 

-第一個電話,早上十點,我未瞓醒就打畀阿婆。

 

「阿婆,你係咪選民呀?」

 

「係呀,係選民好多年lu~~」阿婆今日八十歲,仍然聰明伶俐,對答如流。麻雀強身健體,所言非虛。

 

「投咗票未呀?」

 

「未呀~~飲完茶去投。票站好鬼遠。」

 

「投畀邊個?」

 

「嗰個乜嘢田……田北乜……」

 

仆街,暗叫不妙。聽到呢兩個字,想嘔。

 

「阿婆,不如投你投7號,投畀班律師啦。」

 

阿婆諗咗一諗。

 

「阿婆,孫仔唔會呃你嫁。班律師讀好多書嫁。」ok,我認我好似呃緊佢。

 

「好啦,就投7號。」

 

我晏啲再打去,阿婆同我講佢投咗7號,即係公民黨。

 

-第二個電話,我打畀我老竇個老婆(不是我老母)。

 

佢原本要返工,無諗住去投票。

 

我叫佢投畀8號;入到票站,乜都唔使理,拎咗張票,投8號。

 

四個鐘後,佢打畀我,佢食飯嗰陣用咗十五分鐘排隊,投咗畀8號-我估佢連8號原來係黃洋達都未必知道。

 

-第三同第四個電話,我打咗畀舅父同表弟。

 

佢哋同我講,已經投咗票。投咗畀公民黨。

 

───

 

打一個電話,你有機會幫你心儀嘅候選人搵到一票。喺區議會選定呢啲三數千票就決定到勝負嘅場合,你搵到一個原本唔打算投票嘅人去投票,甚至乎成功喺對家搶一票,影響力係0.07%(千五票當選計)。

 

有10個人咁做,已經係0.7%。

 

你會覺得0.07%,甚至乎0.7%都係好少。但,

 

你投嗰一票,正正係呢0.07%。正因為相信積少成多、匯川成河,個人力量可以影響結局,大家先會珍惜自己嗰一票。

 

我相信,只要大家行多步,就可以將網絡嘅力量伸展到去現實世界。

 

【***非常重要開始***】

 

信我,星期六或者星期日,打五個電話畀你親戚,五個就夠。跟住以下做:

 

(1) 了解下你相打畀佢嗰個親戚住邊個選區。

 

(2) 去立場或者蘋果,睇下嗰區有邊個候選人同你政治理念接近。

https://dce2015.thestandnews.com/

http://hk.apple.nextmedia.com/dc2015/

 

(3) 打去畀親戚-最好係長輩/年青人,問下佢係咪選民。

 

(4) 動之以情,琴棋書畫,請求佢投畀你心儀嘅候選人。如果唔明,請參考我同阿婆嘅對話。

 

【***非常重要完結***】

 

五個電話,重複五次,20個steps。真係咁多。你畀我滾你、畀藍絲親戚屌鳩你,都係五次咁多。你覺得條氣唔順,可以屌柒我、話我多鳩餘,寫篇九千字嘅文屌我,

 

但以上嘅嘢,請你喺嘗試打嗰五個電話之後先做。

 

呢一步,大家願唔願意行,我控制唔到。打咗電話,係咪等同拎到你想要嘅一票,我亦唔敢擔保。不過,舊年瞓街食催淚彈畀差佬打,乜撚都試過,仲有乜嘢好輸?你可以話咁做、同班撚樣一樣咁誤導、咁仆街,係!無分別!但起碼無犯法,亦唔係走灰色地帶!乜對家同你講過守法咩?我寧願要黑暗嘅正義,都唔要光榮嘅失敗。

 

出版社老闆余兒成日講:試,可能得;唔試,一定唔得。

 

大家可以繼續麻怨建制派蛇齋餅糉、掌心雷,

 

但我唔甘心,亦唔相信香港嘅選舉,呢班仆街玩撚晒。

 

大家記住聽日打五個電話,跟手星期日投票。

Share On
Dislike
0
區議會     區選     Relgitsjg - 史兄

發表評論