尋日講過老董團結香港基金提出「補貼置業計劃」可能引起濫用的問題,今日換個政治經濟角度。

 

報告帶頭人、港大金融學院經濟學講座教授王于漸話,若果計劃順利推行,八成人是業主「同坐一條船」,可減少社會分化有利統治。講得白啲,到時大家有層樓,就怕佔中佔旺破壞安寧拖低樓價,寧願乖乖地揸住層樓共享繁榮。且不論冇資格抽加強版公屋居屋六合彩的納稅人會有幾眼紅,用心良苦的維穩大計似乎連政府都唔領情。

 

運房局局長張炳良認為對很多市民來說,租公屋依然最適合。房委會委員蘇偉文就話,計劃同1998年老董的「租置計劃」相似,業主及租戶對屋邨設施有不同需要,有混合管理問題。目前已有唔少公共屋邨因為業主同租戶對管理有唔同需要出現爭拗,試問當呢啲對立更加普遍嘅時候,社會點唔更加分化?既然問題無法解決,房委會對「補貼置業計劃」好有保留。

 

蘇教授仲話,若果計劃推行,房委會前綫員工會有很大壓力。乜壓力? 計我話當然唔係多嘢做的壓力,而係公屋私有化賣出去之後,房委會根本冇需要存在,你叫房委會近萬個員工點算好? 第一班唔肯坐呢條船的香港市民,就係因為香港公共房屋政策而出現的官僚!除了本身的諸多問題,「補貼置業計劃」亦面對好大的政治阻力。不過講開又講,雖然公屋係會繼續起,但房委會其實有冇需要有成萬人咁多呢?

Share On
Dislike
0

發表評論