李思行

以文會友、把歌傾情;追求真善美、常懷赤子心。

可能源於細時嫦娥奔月、后羿、廣寒宮同玉兔嘅傳說俾到我無限想像空間,再加上到咗少年十五二十時就開始對人月雙圓有所冀盼,所以咁多種中國傳統應節食品,最鐘意嘅係月餅,當中又以雙黃蓮蓉月(黃、白蓮蓉都喜歡)為不二之選。

 

喺六十年代,每逢中秋向長輩親友、上司送月餅係香港人嘅基本禮數,但當時一般中國傳統家庭人數比今日多,為免掛一漏萬,一盒月餅雖然十蚊有找,對月入百零蚊嘅打工仔嚟講,要一次過買十盒八盒,確係一啲都唔易負擔。有見及此,聰明嘅商人繼臘腸會之後再發明月餅會(對今日富裕嘅新世代嚟講,相信係一件匪夷所思嘅事),除咗方便顧客分期俾錢之外,重有七折優惠。

 

記得當年家境清貧,家慈同細姨一人供半份。每年農曆八月就開始按月供款,到下一年嘅中秋就可以有四、五或六盒月餅(視乎每份月餅會嘅盒數而定),如果斷供三次就會俾酒樓/餅家「踢出會」。雖然事隔多年,當時每隔一段時間就問家慈攞張月餅會咭(作用類似銀行嘅零存整付存款證)嚟睇,數吓重有幾多個月就有月餅同豬仔花餅(隨月餅會附送)食嘅興奮心情,今日仍然有少少印象。

 

到收咗月餅之後,我另一個心願就係家慈將啲乜嘢五仁月呀、豆沙月呀、金華火腿月統統作為送禮之用,留番啲雙黃蓮蓉月喺屋企過節時享用。

 

今日,已經再無聽到有人要供月餅會,月餅嘅款式亦多咗好多:除咗上面講嘅,重有各種外省月餅、素月餅、為迎合某類人士嘅金箔、魚翅、燕窩、鮑魚(感覺真係好騎呢)同最近喺網上見到嘅海膽月餅(真係攞膽)之外,重有近年銷情直迫傳統月餅嘅冰皮月餅。

 

之所以冰皮月餅有後來居上嘅勢頭,其中一個原因相信係同傳統月餅高糖、高脂、高膽固醇有關。其實一年食一個起兩個止,相信問題唔大,再加上用傳統智慧食傳統食品:食完飲杯普洱、鐵觀音等靚茶,乜嘢油膩都沖洗得七七八八;但偏偏今日大部份人圍埋一齊食咩都係飲汽水同啤酒,結果不問而知。

 

唔怕老套講句,冰皮月餅只係試過一次,至於低糖月餅就未食過,因為網上嘅評語係一面倒:唔好食!

我嘅DIY冰皮月餅 -

將三至四粒雪米糍搓埋一起,喺面度界啲花紋,想靚啲就用月餅模,不過會無咗創意同獨特風格,然後放翻入雪櫃,到送禮嘅時候就用個靚靚紙盒裝住,雖然唔係名牌,但勝在獨一無二、心思取勝!嘻嘻。

 

李思行 面書:

https://m.facebook.com/sixing.li?ref=bookmarks

思行思語 專頁: https://m.facebook.com/profile.php?id=349247198508841

Share On
Dislike
0

發表評論