藍友斑

建築師、公司合伙人,業餘寫作,夾雜於新舊世代之間,寫盡港式生活故事。

創業真係好難,難到幾乎每一個成功的企業家都會同你講,新開的公司99%都係5年內玩完,好多人想創業,最後只係創「孽」。

 

原因好簡單,初初創業的人一定會用盡人情卡,但用盡人情牌後點還,係一大學問,如果還唔到,昔日仗義幫忙的好友會一下子變得如陌路人;因為對方知道追唔到你還,都費時同你傾,免得你傾傾下又用人情牌搵著數;如是者,創業失敗後,只會剩下一堆還唔清的孽。

 

藍友斑身邊都有唔少朋友創了業,但大多以失敗居多,畢竟世上普通人真的很多,他們想到的早已不是甚麼新主意,那是大把人行過的舊路,走上此路後,往往屍骨無數。譬如有朋友上年離開中學科主任的厚職(其薪水不俗),毅然自己一力開辦補習社,他認為中學市場有利可圖,加上自己是科主任的經驗,於是花了逾百萬開設補習社。可是近日出來聚會時,他烏雲蓋頂毫無表情,細問之下他已經耗盡百萬資金,苦無出路,正考慮執笠收場。大家是好友,也不介意在傷口上灑鹽,問他點解「搞成咁」。

 

他打開手機中的excel,詳列每月使費,藍友斑唔係咩企業顧問,但一睇條數,都覺得唔對路,因為係租金開支上,已經每月使5萬,一年60萬就梗,仲有一堆器材,使了10萬元,但他只有100萬的資金,「講真,你咁大使,點回本呀?租金5萬一個月。」他解釋由於他的目標學生都是名校生,家長對場地有要求,唔可以太肉酸之餘,又要有空間收生,搵下搵下就租咗個5萬的盤。

 

一個人可以係教書的材料,但講起行政管理就差到不得了,好似我位朋友咁,無錯,佢教書可能真係好好,但一間補習社除了教書,仲要有大量行政管理、市場推廣、客戶關係等的工作,如果一個人無自知之明,叫佢創孽真係會害咗佢,所以我好反對現在政府高舉Start-Up,講盡創業的好處,呼籲後生仔踴躍Start-Up,但又唔同後生仔講,如果創業失敗,最後可能會下場淒慘,失去資金、時間同朋友。

 

藍友斑自知唔係甚麼出色的企業家,也不打算創甚麼驚天動地的事業,因為見過失敗的例子太多,倒不如安安份份,目標做個「打工皇帝」好過;我記得一田CEO莊偉忠講,做好每一件小事,日積月累地做,最後就成了件大事。呢一點除了有心創業的人要聽之外,一個打工仔都要銘記在心,如果要藍友斑推薦一句職場箴言,一定係呢句。

 

說到底,成功的企業家除了擁有卓越的見識外,仲要有鉅細無遺的執行力,否則創業就淪為空談;截稿之時,我那位友人決定下個月將補習社執笠了,他打算再找一份日校教職,重操故業;我發短訊祝福他,唔係因為我心涼,而係我知道呢個決定,係佢深思熟慮下的「勇決」,覆水難收,但總好過不收,由得佢血繼續流。

 

*《斑駁陸離》逢星期二、四刊於《 香港投資日報》

 

#香港投資日報 #startup #創業 #斑駁陸離

藍友斑 Bernard Facebook專頁

Share On
Dislike
0

發表評論